شنو نسولف مع عيالنا⁉️
ودنا نطلع معاهم أو حتى نقعد معاهم في بيتنا بأجواء حلوة ورايقه، لكن شلون افتح سالفة وموضوع؟ شلون تصير قعدتي مع عيالي ونيسه وحلوة؟ ⁉️
هذا سؤال من أكثر الأسئلة اللي يتكرر علي بالاستشارات 👩🏻🏫
وطبعاً كل مشترك أعطيه جواب خاص حسب شخصيته وظروفه، لكن بحط لكم أفكار عامة ونلهم بعض بالتعليقات 😉
💡 أفكار سوالف مع عيالنا:
🌹 ذكريات الطفولة:
“تتذكر أول يوم مدرسة لك كان ….؟” وبعدها تسأل عن ذكرياتهم.
عيالنا يحبون يعرفون عن ماضينا، بس بأسلوب حلو مو الأسلوب اللي فيه مقارنة؛ (والله احنا يوم كنا صغار سوينا وسوينا…) هذا الأسلوب يعطيهم شعور أنهم أقل 🙃 خلوا سوالفكم ممتعة وخفيفة.
😂 مواقف يومية:
“اليوم بالدوام صار معاي كذا وكذا…..، أنت شخبار دوامك؟ أو شرايك باللي صار معاي؟”
هالاسلوب يخلي العقدة طبيعية وتقرب المسافات بينكم.
👂🏻 استشاراتهم:
عيالنا متعودين نشور عليهم، لكن مو متعودين إحنا نستشيرهم.
جربوا تقولون: “أبي شورك، شنو تشور علي؟”
هذا الأسلوب يعلمهم ثقة كبيرة بنفسهم ويقربهم منكم أكثر.
🌈 أحلام المستقبل:
“لو عندك عصا سحرية، شنو أول شي بتسويه؟”
😂 المواقف المضحكة:
“شنو أكثر موقف ضحكك اليوم؟”
🎤 مواضيع الفضول:
“تتوقعون شنو بيصير لو الناس يطيرون بالفضاء؟”
🎭 لعب الأدوار:
“تخيل نفسك وزير يوم واحد.. شنو القرار اللي بتاخذه؟”
القعدة ما تحتاج تكون مثالية أو محضر لها.
المهم يكون فيها تفاعل و ضحك ودفا💓
لأن السوالف البسيطه اللي تصير بين الأهل و عيالهم ، ساعات تكون أهم لحظة نعيشها في يومنا